நீங்கள் தேடியது "சாதனா சிங்"

லக்னோ:

உத்தரபிரதேசத்தில் ஆளும் பாஜகவைச் சேர்ந்த பெண் எம்.எல்.ஏ சாதனா சிங், மாயாவதி குறித்து மிகவும் தரம் தாழ்ந்த வகையில் கருத்துக்களை தெரிவித்து இருப்பது கடும் சர்ச்சையை ஏற்படுத்தியுள்ளது.

சுயமரியாதை பற்றி மாயாவதிக்கு ஒன்றும் தெரியாது. மகாபாரதத்தில் திரவுபதி பாலியல் துன்புறுத்தலுக்கு ஆளாக்கப்பட்டபின், அவர் பழிவாங்கும் எண்ணத்துக்குத் திரும்பினார். ஆனால், மாயாவதி, அனைத்தையும் இழந்துவிட்டார். 

 

இப்போது, அதிகாரத்தை கைப்பற்றுவதற்காக தனது சுயமரியாதையை விற்கத் துணிந்துவிட்டார். மாயாவதியின் இந்தச் செயலை வன்மையாகக் கண்டிக்கிறோம். பெண் சமூகத்துக்கே மாயாவதி ஒரு கறை என்று விமர்சனம் செய்திருந்தார் சாதனா சிங். 

மேலும், மாயாவதியை பார்த்தால் ஆண் போலவும் தெரியாது, பெண் போலவும் தெரியாது. மூன்றாம் பாலினத்தவர் போல் இருப்பார் எனவும் தெரிவித்திருந்த அவருக்கு பல்வேறு தரப்பில் இருந்து கடும் கண்டனம் தெரிவிக்கப்பட்டது. 

கடுமையான எதிர்ப்புகள் கிளம்பியதால், தனது பேச்சு யார் மனதையாவது புண்படுத்தி இருந்தால் அதற்காக வருத்தம் தெரிவித்துக் கொள்வதாக பாஜக எம்.எல்.ஏ. சாதனா சிங் நேற்று மாலை குறிப்பிட்டிருந்தார்.

மாயாவதியை தரம் தாழ்ந்து விமர்சித்த சாதனா சிங்குக்கு தேசிய மகளிர் ஆணையம் இன்று நோட்டீஸ் அனுப்பியது.

இந்நிலையில், இவ்விவகாரம் தொடர்பாக மாயவதியிடமும் இந்த நாட்டு மக்களிடமும் சாதனா சிங் பகிரங்கமாக மன்னிப்பு கேட்க வேண்டும் என பகுஜன் சமாஜ் கட்சியை சேர்ந்த முன்னாள் எம்.எல்.ஏ. விஜய் யாதவ் இன்று வலியுறுத்தியுள்ளார்.

அப்படி மன்னிப்பு கேட்க தவறினால் சாதனா சிங்கின் தலையை வெட்டி கொண்டுவந்து என்னிடம் ஒப்படைப்பவர்களுக்கு எங்கள் கட்சி தொண்டர்களிடம் இருந்து வசூலித்து 50 லட்சம் ரூபாய் சன்மானமாக தருவேன் எனவும் விஜய் யாதவ் உறுதியளித்துள்ளார். #Sadhanasingh #Mayawati #NCW